Hoxe fai exactamente 33 anos dende que o Tetris vía a luz. Era un 6 de xuño de 1984 cando a obra de Alekséi Pázhitnov, un traballador da Academia de Ciencias da Unión Soviética de Moscú, comezaba a súa andada no ordenador ruso Electronika 60 e cambiaba o mundo dos videoxogos tal e como o coñeciamos. Un xogo que, dende a simplicidade de facer liñas combinando figuras compostas por catro bloques (de aí o nome de Tetris), conseguía enganchar e xerar obsesión en xogadores de todo o mundo. Foi a súa chegada á Game Boy o que o lanzou á fama, e con elo, o Korobéiniki, unha canción tradicional rusa que Hirokazu Tanaka decidíu poñer como banda sonora na versión da portátil de Nintendo. E dende aquela, esa canción é toda unha institución dentro do mundo dos videoxogos e posiblemente a máis versionada. Por eso aquí traemos esta lista coas 8 mellores versións que atopamos. Máis un par de bonus.

1. Smooth McGroove

Non por moi coñecida é menos interesante. Smooth McGroove fixo, co seu peculiar estilo, unha marabillosa versión a capella do tema, na cal o autor fai as distintas liñas mesturándoas creando un estupendo resultado final.

2. Brentalfloss

A especialidade que fixo famoso a Brentalfloss, poñerlle letras a temas de videoxogos. No caso do Tetris foise a un camiño bastante incorrecto políticamente, pero non imos aquí a poñer límites ao humor. É curioso que un tema que ten xa case 9 anos pasase desapercibido no seu momento e agora sería moi ofensivo. Tamén é un indicativo de que imos estando concienciados co que é buscar unha sociedade máis xusta.

3. Melting Pot

Era 1996 e os californianos Melting Pot sacaban o seu Polarities of Paradox. O terceiro tema, Sirtet, era unha versión ska de case 6 minutos do tema do Tetris. A día de hoxe, segue a metérseme na cabeza cada vez que o escoito, quedándose aí durante horas.

4. Dr. P

A principios da década presente, co éxito de Skrillex, parecía que o Dubstep triunfaba comercialmente. Foron anos nos cales moitos artistas se subiron ao carro, e o Dr. P, que a día de hoxe segue traballando de dj, sacaba o seu Tetris en 2011, acadando o posto 185 en Reino Unido. Un tema brutal, que retorce o orixinal ata límites inesperados.

5. Laser Harp

Si, hai un instrumento que mestura luz, a idea básica do theremin e unha actitude moi geek. E chámase Laser Harp. E en Nottingham en 2010, tocaron o tema do Tetris e gravárono en vídeo. Desfrutade.

6. Dave Wave

O ragtime pasou de moda moito antes de que o Tetris aparecese. Pero eso non é un problema para que Dave Wave subise ao seu canal de YouTube esta magnífica e divertida versión. Intentade escoitala sen comezar a bailar como se estivesedes nos tolos anos 20.

7. Screaming Monkey Boner

Metal e videoxogos é unha combinación que non imos chamar orixinal. Pero esta versión dos Screaming Monkey Boner (tamén coñecidos como Screaming Mechanical Brain) é unha delicia de tolemia que é necesario meter nesta lista.

8. Porta

Para rematar, tocamos tamén un pouco de Rap, collendo a versión de Porta na cal collía como base este tema. Como outros temas desta lista, mete unha letra que pouco ten que ver co xogo, pero é un enorme exercicio de estilo por parte do rapeiro barcelonés.

Bonus 1. Kate Tsvetaeva

Kate Tsvetaeva, violinista rusa de renome, colle neste vídeo o propio Korobéiniki, facendo que mundos tan lonxanos como o folk ruso e a electrónica se atopen. Técnica, e un son que resulta marabilloso dende a mesmo orixe que o videoxogo.

Bonus 2. Coro do exército ruso

Non podía faltar, por suposto, a versión do exército ruso do tema orixinal. Unha versión que, vale, vai máis alá do Tetris, pero serve para que entendamos a orixe. Ademáis, con subtítulos en castelán para saber de qué vai a letra orixinal.