Non vou enganar a ninguén se vos digo que eu fun dos moitos que instalou Pokemon Go en canto saíu, aló por xullo do 2016, e que o desinstalou uns meses máis tarde, sendo moi xeneroso co de meses. Os seus inicios foron duros, un consumo de batería excesivo e a falta de moitas das funcións que pouco a pouco foron incorporando, como amizades, novas xeracións e recompensas, fixeron que para moitos este xogo de Niantic non pasara do boom inicial.

Pero aquí estamos, dous anos máis tarde e falando de novo del, despois de que en maio se rexistrara o pico máis alto de ingresos na aplicación dende o seu lanzamento, así que, algo deben estar facendo ben. Eu, coma outros, voltei coa chegada da posibilidade de incluír amigos, ata entón xogaba intermitentemente pero case sempre acababa abrumado pola cantidade de cousas que había que facer para poder continuar xogando no día a día sen volverse tolo, sendo o meu principal problema conseguir pokeballs para seguir cazando de vez en cando, cousa que quedou máis que solucionada coa chegada dos amigos.

Estas novidades fixeron que volvera a interesarme no xogo, a buscar información e a entender mellor todo o que pasaba. E é que, aínda que xogues de vez en cando, hai cousas que hai que saber para non volverse tolo, cousas básicas como saber que defendendo un ximnasio consigues moedas (ata un máximo de 50 ao día en total) e que con esas moedas podes mellorar o espacio para Pokemon e obxectos, algo fundamental xa que hoxe en día, e coa última actualización que acaba de saír na que se inclúen os pokemon de Sinnoh, son máis de 400 os animaliños que podes capturar partindo dun espacio onde non entran máis de 250. Tamén é importante coñecer que hai diferentes niveis para cada pokemon, de mellor a peor, e que aplicacións como Poke Genie (iOS) e Calcy IV (Android) son fundamentais para non mandarlle ao Profesor Willow un que sexa valioso.

Pero se hai algo que realmente hai que descubrir e vivir son as comunidades que se crean ao redor deste mundo, dende o máis básico como pode ser o subreddit xeral, pasando polo subreddit para facer amizades (xenial para subir experiencia e conseguir ovos de ben lonxe), ata chegar ao punto de inflexión como son os grupos locais. No meu caso, en Lugo, contamos con grupos de Telegram para crear e organizar incursións, para organizarnos os de cada equipo, azul, vermello e amarelo, para saber onde hai ximnasios con ocos libres, para saber que misións hai en cada parada e un xeral para a parola. E igual que ocorre aquí, ocorre na maioría de grandes cidades, algo que recomendaría a todo o mundo, sen importar o nivel.

As comunidades cambiaron por completo a miña perspectiva do xogo, pasei de ver as raids e os Mewtwo como cousas inalcanzables a ser un dos momentos de máis adrenalina do día. Deixas de ser ese xogador que vaga pola cidade e pasas a ser un membro máis da liga de entrenadores pokemon, a facer amizades, coñecer xente e a descubrir como moitas persoas seguen adicándolle horas e tempo a un dos mellores videoxogos dos últimos anos, un xogo que che fai saír da casa, pensar e divertirte. Dous anos despois Pokemon Go está no seu mellor momento.